Angolo poesie: “Paisi” di Domenico Passantino

 

Quantu m’assettu e ‘nzoccu vìu?

un paiseddu stinnicchiatu strati strati,
finistruna e campanari asdirrupati,
a chiazza e i vanidduzzi assulicchiati
e io stralunatu e zittu u talìu.

Comu l’erva maronna o a furdica,
o comu ‘na furnicia chi m’addica
una liccata d’u cori chi mi detti
arristà ‘mpiccicata ‘nte so ruvetti.

‘Nta ‘sti mura di petra di issu,
arristaru ‘mpinti troffi di pinzeri,
arristaru ‘ngramagghiati ‘nte cosi d’aieri
cosi chi sacciu e chi penzu spissu.

I mula unnè chi su?
eppuru arrestanu i trazzeri,
cristiani ci n’è chiù?
eppuru ancora nescinu i Misteri!

Nescinu u Venniri Santu
comu un chiantu
di ‘sta terra chi chianci abbannunata,
comu un lamentu chi lamenta
chi fu lassata,
chi chicchìa
picchiusa
picchì si ni vannu
e nun nu sannu
ca chianci e grida ‘sta matri addulurata,
comu iddi sparpagghiati ‘nta ‘stu munnu,
ch’è tuttu un paisi,
ma no chiddu ca o munnu
mi misi.

di Domenico Passantino