da Angolo Poesie
U cori granni quantu u mari avii
e chinu d’amuri pi tò figghi lu tinii
O suli ti mittii a riccamari
e li viscini ‘ntunnu a tia si vinianu assittari
A iddi la tò vita ci cuntavi
di quannu nicaredda e senza patri
a ‘nchiuiti o culleggiu ti purtaru
mmenzu li testi ‘nfasciati e li vicchiareddi abbannunati
e tu cu lu tò chiantu lavavi lu ciacatu
ma poi turnavi nò prisenti
e cu li smafari u siddiu allontanavi
e la stratuzza ri risati s’inchia
Tantu è lu tempu cà passatu
e la tò peddi ora è tutta arripicchiata
li peri ti li tiri a strascinuni
nall’acqua trasi e nesci lu muccuni
U lumi ri la menti si va astutannu
e comu na picciridda st’addivintannu
un gori chiù lu preu di la vita
né cunti li stasciuna
e pi tia lu jornu
comu agghiorna scura
Talii lu figghiu tò
e ci runi di vossia
comu si fussi u straniu chi incontri pi la via
e a mia ca ri figghia ma trattatu
ogni mumentu u me nomi vo ricurdatu
Ti talìu e tanta pena sentu pi tia
e quannu ti lavu, ti vestu, ti sfamu
e tu amurusa mi rici: ”U Signuri tu paa figghia mia”
è sulu allura ca ri gioia
mi si inchi u cori a mia
di Giuseppina Magione