“I dati dâ memoria”, poesia di Domenico Passantino in occassione del 25° anniversario delle stragi del 23 maggio e del 19 luglio 1992

di Angolo Poesie*

I dati dâ memoria 23 maggio/ 19 luglio

A maggiu, tempu ri favi

e di cirasi maiulini,

i tinti si ‘nmiscanu chi bravi

e i scarti chi cretini.

 .

Tutti pensanu e su siddiati

pi chiddi chi mureru ammazzati

e dicinu ca un c’è nenti di cchiù lariu

di Falcone e Borsellinu ca satàru ‘ntall’ariu”.

.
Minchia, quantu semu sdisonurati,

nuatri chi ‘nta sti iurnati

chiamamu i strati

cu i nomi d’iddi,

quantu semu picciriddi,

nuatri, chi facemu i minchia pi un ghiri surdati,

e stamu ccà ‘nta st’Isola di Cariddi:

quantu semu disgraziati!

.

Avemu l’aricchi di sceccu,

e un sapemu ascutari,

d’u gaddu avemu u beccu,

e un sapemu cantari,

l’occhi talianu ‘ntinni ‘ntinni

e s’a firanu sulu a futtirisinni.

.
Ni cuntamu tutti sti storii

e a tutti ni mori u cori,

e ni facemu piatusi piatusi…

.

Minchia, quantu semu fitusi,

tutti contrari ai mafiusi

e i strati su tutti purtusi purtusi.

.

E si mettinu ‘nto menzu puru chiesi e parrini…

minchia, chi semu cretini!

l’aeroportu sutta a muntagna e ‘nmenzu u mari,

a pinsarici, è propriu na vriogna:

quali ‘ncigneri finu u fici funzionari?

quali cretinu

ci misi poi “Falcone e Borsellino”,

comu si fussi una marca di càvusi?

Minchia, quantu semu fàvusi:

n’abbasta sfilari ‘nta chiazza cu strisciuni

e affilari u cuteddu ‘nto saccuni,

babbiamu comu si ghiucassimu o palluni,

babbiamu comu si ghiucassimu una partita

e ni sintemu subitu a cuscienza cchiù pulita.

.

Ora ca un ci sunnu chiù bummi né scupetti,

semu tutti corretti bravi perfetti;

ora ca coppula e lupara

fannu moda e fannu storia

e a mafia unn’è chiù na cosa seria,

ci arrifriscamu a memoria

e puru l’armuzza

nuatri, tutti testi di cucuzza,

nuatri, tutti furbi comu i vurpi:

nuatri, tutti santi e senza curpi.

*di Domenico Passantino

Il gigantesco murales di Falcone e Borsellino, appena completato domina la Cala di Palermo.
Il disegno è stato realizzato dagli street artists Rosk e Loste, due giovani che si sono diplomati all’Accademia di Belle Arti di Palermo.